Dis nie myne nie?!

So gesels ek nou die dag met Tienie. Tienie die sakeman, visserman, bootman, geldman, kom-drink-‘n-koeldrink-man, Toyota hilux man, parrafien man en nog vele meer. Ek vra hom hoe dit met die vis saam gaan. Hy antwoord iets soos: “Bliksem ouboet, jy sal my nie glo nie, seker meer as 6 maande laas aan ‘n visstok geraak. Haal nou die dag my katrol uit toe sê ek vir my self, self, hierdie kannie jou katrol wees nie. Jou katrol was nie só óp toe jy hom laas gebêre het nie, die lyn was nog blink en die spoel het nog getol…Kannie myne wees nie. Dis nie myne nie. Maar dit is…!” En ek dink – Ek weet presies hoe dit voel…



Laasnag was ook die koms van Shallie - die kleur van skalie en 'n kruis tussen Shadow en Stallie. Dit kom van Stalliemannewales...Hierin is 'n les te leer. Stallie, dit is joune!

Fred vir Ruan

Oom Ben stroop koring en Fred (die stroper) is natuurlik daar om te help. As ek ‘n koring stroper sien dink ek aan Ruan met sy Cars versameling. Ek is steeds spyt dat ek nie daardie dag toe hy hier was vir hom ‘n Fred kon wys nie. Daarom dan die fotos. Jammer Ruan, ek weet Fred is eintlik rooi, maar sy bek is darem rooi - al is die lyf groen. Die Bosluis voëls (Egretts) kom sit waar Fred gestroop het om al die goggas te eet. Vir hulle ‘n tyd van absolute oorvloed – ook vir die Kweleas – tot die boere se frustrasie, want hulle stel net in die koringare self belang. Sulke wolke voëls, duisende der duisend van hulle – ek dink tog die duiwe in die sonneblomme vroër die jaar was net so erg indien nie erger nie. Vanoggend het ons gesien hoe ‘n valk van die Kweleas vang om te eet. Die valke is ook seker redelik dik gevreet! So sorg die boere se gewerskaf nie net vir ons mense se pense nie, maar maak ook verder ‘n bedrae. Dis ook hoekom boere so ver moontlik moet weerhou van die gebruik van gifstowwe wat van een vreter na die volgende in die voedsel ketting oordra en doodmaak.

Verder sny ek nou heerlik gras hier om die huis met die plaas se trekkertjie-grassnyer. Dis woorwaar iets waarin ‘n mens maar kan belê, amper soos ‘n skottolgoed wasser… Dis nou as jou grasperk dit regverdig!