Vrydag!!

Ek sien met gemengde gevoelens na Vrydae uit. Vandag was egter redelik. Met my oggendstap kyk ek na die beeste (almal koeie wat nou moet kalf) en daar begin hol hulle almal in 'n rigting. Dit lyk kompleet soos blouwildebees trek op 'n mielie Serengeti. Ek haas my so vinnig as wat my longe toelaat die 400 meter terug woonstel toe sodat ek met die bakkie kan gaan kyk. Kom ek toe daar is daar een koei met "amadlebele inghagha!", en dan wys ek soos 'n visterman hoe lank die ore na my mening was, voor. Die een met die lang ore hol stert in 'n boog getrek, en seker 'n goeie 50 of meer van die trop hardloop heel op hol agterna. ooglopend na niks!! Daar kom seker reen...

Die "amadlebele inghagha!" is Xhosa vir iets soos "ore wat so is!" wat natuurlik met 'n arm of hand verwysing gepaard gaan. (Daar was 'n ou man op ons plaas wat eendag vir my pa so beduie het toe hy moes verduidelik hoe 'n nuwe kalfie lyk.)
Ek hou van die manier van se. Dit hou so aan, net so lank soos daai baster Brahman se ore...lees dit hardop vir jouself dan verstaan jy wat ek bedoel.

Ek het na die bees kyk koffie gaan drink by die plaas kontoor en daarna was dit ek, die besem, 'n ou lap en my vloere. So tussen die pype en drade deur het ek darem die plek so onderlangs skoon gekry. Hier oor die warm deel van die dag hoor mens sulke flou dreunings, dan is dit 'n dwarrelwind wat oor die dak waai en die stof dwars deur die plekkie as die deure of vensters oop staan.