No3 of No5??

Ons kuier nou die dag hier saam met gawe mense en soos dan die gewoonte is word stories vertel om ‘n gevoel te gee en ook gevoel te kry van mense. So vertel, vertel voel mens mekaar dan met woorde uit om elk ‘n idee te vorm van die ander. Die verteller was bleddie snaaks en hulle moes amper 220v nader bring soos ek gelag het.

Die storie wat ek oor vertel sal ek maar “No3 of No5?” noem.

Die twee broers is boer klonge daar uit die oos Vrystaat, hul pa is vroeg dood met die gevolg dat die ma hulle groot gemaak het. Sy had seker nie lus vir weer trou nie en die dat sy toe self met hulle aangaan.

Die laaities is stout, maar werk hard op die plaas so tussen die poetsbakkery en kattekwaad deur en die antie kry hulle darem so dat die jongste ook 21 haal en daar word opslag partie gehou.

Al die vrinne is genooi en daar word tot laat gekuier en gedans en grappe gemaak en mampoer gedrink en koeldrank gedrink en so nou en dan ‘n stukkie geëet ook.

Laat die aand toe die grappe begin opdroog en die kruike na leeg se kant toe staan is die manne darem goed gevat.

Die oudste broer raak ongemerk eenkant weg en gaan maak ‘n No3 hael patroon oop, haal die lopers uit en gooi meel in, maak dit weer versigtig toe en kom windgat by die geselsery ingeloop.

“Hey boetie!” daag hy uit, “jy’s so gesuip jy sal my nie op 15 tree met die haelgeweer raakskiet nie!” “Wat wou! Kom laat ons sien, ek skiet jou op 20 tree in jou mo..r.”

Die jonger boetie gryp die geweer en met die ouer een se wegstap na ‘n 20 tree merk hou die jong mannetjie kop en kyk wat dan nou gelaai is. Hy fluit deur sy tande toe hy sien dis No3, voel in sy sak en sit ‘n No5 in, die No3 sit hy in sy sak. Hy lê aan en skiet sy ou boet binne in die hospitaal in. Eina seer.

Die volgende dag in die hospitaal na die ouboet hom darem vreeslik uitgevreet het oor die skietery sê hy: “Man jy kan bly wees jy’s net in die hospitaal, as ek jou met die No3 wat in die haelgeweer was geskiet het, het ek jou sekerlik dood geskiet!”